الأحد، 4 يناير، 2009

هو فى ايه؟

لاول مرة فى حياتى بشوف بومه واقفه مع هدهد صغير
واخدين ركن ساعه المغربيه فوق شجرة البرتقال
استغربت جدا للمتهم الغريبه دى
الهدهد الجميل مع البومه الغبيه ..
معرفش ايه خلانى مسكت طوبه وحدفت الشجرة
فطار الهدهد وبصتلى البومه بعنيها اللى بتدق شرار
ولقيتها جايه ناحيتى.......
خفت مفيش مكان استخبى فيه غمضت عنيا وخبيت وشى كله باديا
وفى بالى كلمه واحدة من امى البومه بتخطف العيون
ودا كله ليه؟
يارتنى ماحدفتها انا اللى حشارريه
عنيا وجعتنى من الضلمه
عايزة افتح وخايفه
مش سامعه اى صوت حواليا
جايز مشيت ..
فتحت..
ملقتش الا الشجر الساكت.. وسؤال بيلح عليا انا ايه مخوفنى اوى كدا
مشيت وانا برضو مش مطمنه
وشويه و سمعت صوتها المشؤم بتقرب وتقرب
صرخت استنجد بحد ينقذنى وينقذ عنيا..
ومرة واحدة حسيت الدنياساكته
ساكته زيادة عن اللزوم..
اكيد البومه خدت عنيا
لكن لا
جايز اغمى عليا وانا بصرخ!
كل دا من الخوف
وايه يعنى اما البومه تقرب عليا واصدها باديا
ومسلمش لخوفى
ايه يعنى؟
غمضت عنيا تانى
وقولت هفتح وهشوف تانى اكيد
فتحت...
وبرضو مشفتش حاجه
قلقت
هو انا جرلى ايه؟
طيب انا هتصالح مع ضلمتى وهفتح عينى واغمضها ليه اصلا طالما مش شايفه حاجه..
وبرضو مقتنعه ان البومه ماخدتش عنيا
دا كله م الخوف العين
ومشيت شويه اتكعبل فى الارض وشويه اتخبط فى شجرة
انا فاكرة طريق بيتنا..
هو جمب جنينه البرتقال
مشيت كتير اكتر من ماكنت بمشى وانا بشوف
طب كل دا محدش بيقابلنى فى السكه ليه
طب فين امى ولا اخواتى هى الدنيا زمانها ليلت اوى محدش سئل عنى
هو فى ايه؟
واخيرا سمعت صوت
دا زى صوت ضفدع
ممممم يبقا انا قريبه من ترعه الميه اللى ورا بيتنا
هو انا بلف حوالين نفسى
لالا انا اكيد بحلم كل دا من البومه الفقر
بس انا كنت هتجنن هى بتعمل ايه مع الهدهد
بومه وهدهد
واتخبطت تانى فى شجرة الله اعلم
حسست باديى وكل دا مش مصدقه
انى ازى متقبله انى اتعميت وبكل البرود دا
دى مش شجرة دا باب بيتنا
اااه دا باب بيتناكان متورب وعشان كدا بيروح ويجى فى ايدى
الحمد لله
بس فين اخواتى وامى وابوياالله!!!!!
ياامه ياابا
ياامه ياابا
محدش بيرد ليه؟
هو فى ايه؟
طيب هخش اغسل واتوضى واصلى
الحمام كان فين!!!!!!!!!!
اه دا مكانه..
مش هيبقا عمى عين وبصيرة
دخلت اتوضيت وخرجت اصلى
ياترى القبله فين
هو انا لحقت نسيت
ياامه ياابا انتو فين
يابنتى اجمدى ومتبكيش كل دا من البومه ..
اكيدد سحرتنى
استغفر الله العظيم دا انا راحه اصلى
اتجننت وبكلم نفسى
الله اكبر الله اكبر
وسمعت الصوت
اكمل صلا ولا اخرج اقول انا جيت
تفكير فى الصلاة.... اه ياانا ياربى
ياامه ياابا انا هنا
انا جيت
خرجت للصوت
دا برة البيت ..
لا مش هخرج ممكن اتوه تانى
طب ابص من الشباك
دخلت على اوضتى حسست لحد ماوصلت ..
مش شايفه حاجه لكن سامعه صوت حاجه بتقرب
دا صوت البومه صرخت جريت
وقعت فتحت عنيا بعد مجهود
لقيتنى نايمه على سريرى
فضلت اضحك
وفرحت اوى انى شايفه تانى دا كان حلم اكيييد
بس ازى لالا فى حاجه غلط
وجريت على الشباك عشان اقفله
لمحت البومه جايه جرى عليا وعنيها بتدق شرار...
الله !!!!
انتهت

هناك 3 تعليقات:

واحد من الناس يقول...

انا طبعا مش داخل اقول رايي انا داخل ابلغك اني زعلان منك لان رايي معروف في اعمالك طبعا جميل اي شي بتكتبيه

اخوكي / عامر (واحد من الناس)

واحد من الناس يقول...

انا طبعا مش داخل اقول رايي لان رايي معروف انتي مابتكتبيش حاجه وحشه

انا داخل اقولك اني زعلان منك قوي

اخوكي عامر (واحد من الناس)

واحد من الناس يقول...

انا زعلان منك زعل

اخوكي

عامر